За Комисијата за спречување и заштита од дискриминација (КСЗД)

Комисијата за спречување и заштита од дискриминација (КСЗД) е самостоен и независен државен орган, основан со Законот за спречување и заштита од дискриминација. Како гарант за почитување на принципот на еднаквост, Комисијата има овластувања да спречува и санкционира различни облици на дискриминација, да промовира еднакви можности и да обезбедува ефективна заштита на човековите права.

Визија

КСЗД се стреми да биде двигател на позитивни општествени промени преку обезбедување суштинска еднаквост, промоција и унапредување на човековите права и елиминирање на сите форми на дискриминација. Нашата визија е институција која ужива висока доверба кај граѓаните и која придонесува за градење правично, инклузивно и демократско општество.

Мисија

КСЗД е независно, професионално, ефективно и ефикасно тело кое делува проактивно и транспарентно, со цел да одговори на потребите на граѓаните за заштита и промоција на нивните права. Во своето работење, Комисијата се раководи од принципите на:

законитост и независност во одлучувањето,
стручност и непристрасност,
транспарентност и отчетност,
пристапност за сите граѓани, без разлика на нивниот личен или општествен статус.

Улога и надлежности

Комисијата:

постапува по претставки за дискриминација и носи одлуки;
дава мислења и препораки за усогласување на законодавството со антидискриминациските стандарди;
врши мониторинг и анализа на состојбата со дискриминацијата во државата;
спроведува превентивни и едукативни активности;
соработува со државни институции, граѓански организации и меѓународни партнери.

Ресурсен центар

Ресурсниот центар на КСЗД претставува стратешка иницијатива за зајакнување на превенцијата и заштитата од дискриминација преку создавање на онлајн платформа која обезбедува:

пристап до законски и подзаконски акти, анализи и истражувања;
образовни и едукативни материјали за граѓански организации, истражувачи, новинари и пошироката јавност;
публикации и ресурси кои промовираат еднаквост и човекови права;
поддршка за академски и практични истражувања во областа на недискриминација и човекови права.

Ресурсниот центар е замислен како отворена и транспарентна база на знаење, која им овозможува на граѓаните, институциите и експертите лесен пристап до релевантни информации. Со тоа, тој претставува значаен чекор кон градење на култура на еднаквост, инклузивност и почитување на човековите права во Северна Македонија, во согласност со европските стандарди и практики.

Реализацијата на Ресурсниот центар е овозможена со поддршка од Европската Унија во рамките на програмата „Владеење на правото – Северна Македонија“, што претставува јасен доказ за усогласеноста на КСЗД со европските вредности и приоритети во областа на демократијата, владеењето на правото и заштитата на човековите права.